Monday, April 25, 2011

30 வகை தயிர் -மோர் ரெசிபி !

நாக்குக்கு ருசியாக என்பதோடு... உடலுக்குப் பொருத்தமானதாகவும் சாப் பாடு இருக்க வேண்டும் என்பது மிக முக்கியமல்லவா! அதனால், அதீத குளிர்ச்சி தேவைப்படும் இந்தக் கோடைக்கேற்ப 30 வகை தயிர்-மோர் ரெசிபிகளை இங்கே சமைத்திருக்கிறார் 'சமையல் கலை வித்தகி' கிருஷ்ண குமாரி ஜெயக்குமார்!

ருசியாக சமைப்பதோடு, அதை ரசனையுடன் பரிமாறுவதிலும்தான் இருக்கிறது நளபாக சூட்சமம். அந்த வகையில், நாவில் நீர் ஊறவைக்கும் இந்த 30 வகை ரெசிபிகளை இங்கே அழகாக அலங்கரித்திருக்கிறார் 'செஃப்' ரஜினி (சென்னை அருகேயுள்ள பள்ளிக்கரணையில் 'ஸ்டார் கார்விங்' என்ற பெயரில் ஒரு நிறுவனத்தை நடத்தி வரும் இவர், திருமண வைபவங்கள், விழாக்கள், வீட்டு விசேஷங்களில் காய்கறி மற்றும் பழங்களை அலங் கரித்துத் தருவதோடு, காய்கறி, பழங்கள், ஐஸ், பட்டர், சாக்லேட் மற்றும் தெர்மகோலில் கார்விங் செய்வது பற்றிய பயிற்சியையும் கொடுக்கிறார்).

இருவரின் கை வண்ணத்தில் இங்கே மிளிரும் தயிர்-மோர் ரெசிபி கள், 'ஜில்லுனு ஒரு கோடைக்காலத்தை' உங்களுக்கு உரித்தாக்கட்டும்!

எப்போதும் காரசாரமாக சாப்பிடுபவர் கள், இந்த சீஸனில் காரத்தை முற்றிலும் குறைத்துக் கொள்வது நல்லது.

 வெங்காயம் உடலைக் குளிர்ச்சியாக் கும் தன்மை கொண்டது.

 வெயில் காரணமாக நாம் அதிக அளவில் இழக்கும் சக்தியை திரும்பவும் மீட்டுத் தருவதில் எலுமிச்சைக்கு நிகர் இல்லை.

 தக்காளி ஜூஸில் சிறிது தேன் கலந்து பருகும்போது வெயிலால் உண்டான உடல் உஷ்ணம் தணியும்.

 கோடை வெயிலில் தவிர்க்க முடியாமல் சுற்ற வேண்டியிருந்தால்.. கையோடு இஞ்சியை அரைத்து சாறெடுத்து சிறிது தேன், தண்ணீர் ஊற்றி கலந்து பாட்டிலில் எடுத்துச் செல்லுங்கள். பயணத்துக்கு ஏற்ற பானம் இது.

 சூரிய உஷ்ணத்தால் உடலிலிருந்து வெளியேறக்கூடிய தாது உப்பு மற்றும் சக்தியை ஈடு செய்ய உதவுகிறது வெள்ளரிக்காய்.

 உடல் சீதோஷணத்தை சீராக வைத்துக் கொள்வதில் வாழைப்பழத்துக்கு முக்கிய பங்கு உண்டு.

 உடல் உஷ்ணத்தையும், தாகத்தையும் தணித்து, வயிற்றைக் குளுமையாக்கும் தர்பூசணி, கண்ணுக்கும் நல்ல குளிர்ச்சியைத் தரும்.

அதிக அளவு தாது உப்புக்கள் நிறைந்த இளநீர், தாகத்தை தணிப்ப துடன், உடலுக்குக் குளிர்ச்சியைத் தரும்.

 ஸ்ரீகண்ட்

தேவையானவை: கெட்டித் தயிர் - 100 கிராம், பொடித்த சர்க்கரை - 25 கிராம், குங்குமப்பூ (பாலில் ஊற வைக்கவும்) - கால் டீஸ்பூன், ஏலக்காய்த்தூள் - கால் டீஸ்பூன், பொடியாக நறுக்கிய பாதாம், முந்திரி - தலா ஒரு டீஸ்பூன்.

செய்முறை: தயிரை ஒரு மெல்லிய துணியில் கட்டி தண்ணீர் வடியும் வகையில் 2 மணி நேரம் வைக்கவும். தண்ணீர் முழுவதுமாக வடிந்ததும் தயிரை ஒரு பாத்திரத்தில் போடவும். இதில் பொடித்த சர்க்கரை, குங்குமப்பூ, ஏலக்காய்த்தூள், பொடியாக நறுக்கிய முந்திரி, பாதாம் சேர்த்து நன்றாகக் கலக்கவும். இந்தக் கலவையை சிறிய கப்களில் ஊற்றி, ஃப்ரிட்ஜில் வைத்து எடுத்துப் பரிமாறவும்.

 பூசணி - தயிர் பச்சடி

தேவையானவை: வெண் பூசணி - ஒரு கீற்று, தயிர் - 100 கிராம், கடுகு, உளுத்தம்பருப்பு, சீரகம் - தலா கால் டீஸ்பூன், பச்சை மிளகாய் - 3, கறிவேப்பிலை - சிறிதளவு, எண்ணெய் - ஒரு டீஸ்பூன், உப்பு - தேவையான அளவு.

செய்முறை: பூசணிக்காயைத் துருவி நீரை வடித்துக் கொள்ளவும். கடாயில் எண்ணெய் ஊற்றி... கடுகு, உளுத்தம்பருப்பு, கறிவேப்பிலை தாளித்து, பூசணித் துருவலை சேர்த்து ஒரு நிமிடம் வதக்கவும். பச்சை மிளகாய், சீரகம் இரண்டையும் சேர்த்து விழுதாக அரைத்து, உப்பு சேர்த்து தயிருடன் கலக்கவும். வதக்கிய பூசணியை, தயிர் கலவையுடன்  கலந்து பரிமாறவும்.

 மின்ட் கூலர்

தேவையானவை: மோர் - 150 மில்லி, புதினா இலை - 12, இஞ்சித் துருவல், மிளகு, சீரகம் - தலா கால் டீஸ்பூன், உப்பு - தேவையான அளவு.

செய்முறை: புதினா, இஞ்சி, மிளகு, சீரகம், உப்பு ஆகியவற்றை ஒன்றாக சேர்த்து அரைத்து, மோரில் கலக்கவும். நன்றாக குளிர வைத்துப் பரிமாறவும்.

 மாம்பழ ஸ்மூத்தி

தேவையானவை: மாம்பழம் - 1, பொடித்த சர்க்கரை - 2 டீஸ்பூன், கெட்டித் தயிர் (துணியில் கட்டி நீரை வடித்து எடுக்கவும்) - 50 கிராம், ஏலக்காய்த்தூள் - ஒரு சிட்டிகை, பொடியாக நறுக்கிய மாம்பழத் துண்டுகள் - சிறிதளவு.

செய்முறை: மாம்பழத்தை நறுக்கி துண்டுகளாக்கவும். கொஞ்சம் துண்டுகளை தனியே எடுத்து வைத்துவிட்டு, மீதியை கூழாக்கவும். இதில் சர்க்கரை, வடிகட்டிய தயிர், ஏலக்காய்த்தூள் சேர்த்து நன்றாகக் கலக்கவும். சிறிய கப்களில் மாம்பழக் கலவையை ஊற்றி, மாம்பழத் துண்டுகளை மேலாகத் தூவி, குளிர வைத்துப் பரிமாறவும்.

வெள்ளரி மோர்

தேவையானவை: தயிர் - 100 கிராம், சிறிய வெள்ளரிக்காய், பச்சை மிளகாய் - தலா 1, நறுக்கிய கொத்தமல்லி - ஒரு டேபிள்ஸ்பூன், உப்பு - தேவையான அளவு.

செய்முறை: வெள்ளரிக் காயை நறுக்கி, பச்சை மிளகாய், கொத்தமல்லி, உப்பு சேர்த்து மிக்ஸியில் இரண்டு முறை சுற்றி... தயிர், சிறிது தண்ணீர் சேர்த்து அரைக்கவும். வடிகட்டி குளிர வைத்துப் பரிமாறவும். தேவைப்பட்டால் மேலும் தண்ணீர் சேர்த்துக் கொள்ளலாம்.

 இஞ்சி - தயிர் பச்சடி

தேவையானவை: இஞ்சித் துருவல் - 2 டேபிள்ஸ்பூன், தயிர் - 100 கிராம், காய்ந்த மிளகாய் - 2, கறிவேப்பிலை - சிறிதளவு, கடுகு, உளுத்தம்பருப்பு - தலா கால் டீஸ்பூன், எண்ணெய், உப்பு - தேவையான அளவு.

செய்முறை: கடாயில் எண்ணெய் விட்டு, காய்ந் ததும் கடுகு, உளுத்தம்பருப்பு, காய்ந்த மிளகாய், கறிவேப் பிலை சேர்த்து தாளிக்கவும். துருவிய இஞ்சியை அதில் சேர்த்து ஒரு நிமிடம் வதக்கி இறக்கவும். தயிரில் உப்பு சேர்த்துக் கலக்கி, வதக்கிய இஞ்சித் துருவல் கலவையுடன் கலந்து பரிமாறவும்.

இது ஜீரணத்துக்கு மிகவும் நல்லது.

 கார்ன் தயிர் வடை

தேவையானவை: சோள முத்துகள் - 100 கிராம், இஞ்சி - ஒரு சிறிய துண்டு, பச்சை மிளகாய் - 4, தயிர் - 100 கிராம், பெருங்காயத் தூள், கடுகு, உளுத்தம்பருப்பு - தலா கால் டீஸ்பூன், மிளகாய்த்தூள் - ஒரு சிட்டிகை, நறுக்கிய கறிவேப்பிலை கொத்த மல்லி - சிறிதளவு, எண்ணெய், உப்பு - தேவையான அளவு.

செய்முறை: சோளத் துடன் இஞ்சி, பச்சை மிளகாய், உப்பு சேர்த்து வடைக்கு அரைப்பது போல் அரைக்கவும். அரைத்த மாவை வடை போல் தட்டி, காயும் எண்ணெயில் பொரித்தெடுக்கவும்.

தயிருடன் உப்பு சேர்த்து அடித்துக் கொள்ளவும். கடாயில் எண்ணெய் ஊற்றி, காய்ந்ததும் கடுகு, உளுத்தம்பருப்பு, கறிவேப்பிலை, பெருங்காயத்தூள் தாளித்து தயிரில் சேர்க்கவும். வடைகளின் மேலாக தயிரை ஊற்றி... மிளகாய்த்தூள், கொத்தமல்லி தூவி பரிமாறவும்.

 சேமியா பகாளாபாத்

தேவையானவை: சேமியா - 100 கிராம், தயிர் - 50 கிராம், பால் - 50 மில்லி, இஞ்சித் துருவல் - ஒரு டேபிள்ஸ்பூன், பச்சை மிளகாய் - 2, கறிவேப்பிலை - சிறிதளவு, திராட்சை, மாதுளை முத்துக்கள் - ஒரு கைப்பிடி, ஆப்பிள் துண்டுகள் - 3 டேபிள்ஸ்பூன், கடுகு, உளுத்தம்பருப்பு, கடலைப்பருப்பு - தலா கால் டீஸ்பூன், பெருங்காயத்தூள் - ஒரு சிட்டிகை, எண்ணெய் - 2 டீஸ்பூன், உப்பு - தேவையான அளவு.

செய்முறை: கொதிக்கும் நீரில் சேமியாவைப் போட்டு, ஒரு நிமிடம் வைத்திருந்து வடிகட்டவும், கடாயில் எண்ணெய் விட்டு, காய்ந்ததும் கடுகு, உளுத்தம்பருப்பு, கடலைப்பருப்பு, கறிவேப்பிலை சேர்த்து தாளித்து இறக்கவும். இஞ்சித் துருவல், பச்சை மிளகாய், பெருங்காயத்தூள், தயிர், உப்பு ஆகியவற்றை தாளிப்புடன் சேர்த்துக் கலக்கவும். இதை சேமியாவில் சேர்த்துக் கலந்து... பால், பழங்களை சேர்த்து நன்றாகக் கிளறவும்.

அப்படியே சாப்பிடலாம். அல்லது ஃப்ரிட்ஜில் வைத்து குளிர்ச்சியாகவும் பரிமாறலாம்.

 பழ தயிர் பச்சடி

தேவையானவை: ஆப்பிள், வாழைப்பழம் - தலா 1, கறுப்பு, பச்சை திராட்சை (சேர்த்து) - 50 கிராம், மாதுளை முத்துக்கள் - 2 டேபிள்ஸ்பூன், ஆரஞ்சு சுளைகள் - 10, பப்பாளி - ஒரு பெரிய துண்டு, ஸ்ட்ராபெர்ரி - 4, தயிர் - 100 கிராம், தேன் - 2 டேபிள்ஸ்பூன்

செய்முறை: பழங்களைப் பொடியாக நறுக்கவும். ஒரு பாத்திரத்தில் எல்லாப் பழங்களையும் போட்டு, தயிர் சேர்த்து நன்றாகக் கிளறவும். மேலாக தேனை ஊற்றிப் பரிமாறவும்.

விருந்தில் பரிமாறுவதற்கு ஏற்ற ரிச்சான பச்சடி இது!

 வெந்தய தயிர் பச்சடி

 

தேவையானவை: முளைகட்டிய வெந்தயம் - 2 டேபிள்ஸ்பூன், தயிர் - 100 கிராம், கடுகு, உளுத்தம்பருப்பு - தலா கால் டீஸ்பூன், காய்ந்த மிளகாய் - 2, எண்ணெய் - ஒரு டீஸ்பூன், உப்பு - தேவையான அளவு.

செய்முறை: முளைகட்டிய வெந்தயத்தை ஆவியில் 5 முதல் 8 நிமிடம் வேகவிட்டு எடுக்கவும். கடாயில் எண்ணெய் விட்டு, காய்ந்ததும் கடுகு, உளுத்தம்பருப்பு, காய்ந்த மிளகாய் தாளிக்கவும். வேக வைத்த வெந்தயத்தை சேர்த்துக் கிளறி... தயிர், உப்பு சேர்த்துக் கலக்கவும்.

சுகர் பிராப்ளம் உள்ளவர்களுக்கு ஏற்ற குளுமையான பச்சடி இது.

 டிரை ஃப்ரூட்ஸ் ரெய்தா

தேவையானவை: முந்திரி, பாதாம், பிஸ்தா, அக்ரூட் (பொடியாக நறுக்கவும்) - தலா 2 டீஸ்பூன், பேரீச்சம்பழத் துண்டுகள் - 2 டேபிள்ஸ்பூன், மிளகுத்தூள் - கால் டீஸ்பூன், தயிர் - 100 கிராம், காய்ந்த திராட்சை - ஒரு டேபிள்ஸ்பூன், நெய் - அரை டீஸ்பூன், உப்பு - ஒரு சிட்டிகை.

செய்முறை: நெய்யில் திராட்சையை வறுக்கவும். தயிரில் உப்பு, மிளகுத்தூள் சேர்த்துக் கலக்கவும். பொடியாக நறுக்கிய முந்திரி, பாதாம், பிஸ்தா, அக்ரூட்டை தயிர் கலவையுடன் சேர்க்கவும். பேரீச்சம்பழத் துண்டுகள், வறுத்த திராட்சையையும் அதில் சேர்த்துக் கலக்கவும்.

விருந்துக்கு ஏற்ற சுவையான டிரை ஃப்ரூட்ஸ் ரெய்தா ரெடி!

 மலாய் லஸ்ஸி

தேவையானவை: தயிர் - 100 கிராம், பால் ஏடு, பொடித்த சர்க்கரை - தலா 2 டேபிள்ஸ்பூன், சீரகத்தூள் - கால் டீஸ்பூன்,  ரோஸ் வாட்டர் - 3 சொட்டு, உப்பு - ஒரு சிட்டிகை.

செய்முறை: தயிருடன் உப்பு, சீரகத்தூள், சர்க்கரை சேர்த்து மிக்ஸியில் அடிக்கவும். இதை டம்ளரில் ஊற்றி மேலாக பால் ஏடு, ரோஸ் வாட்டரை சேர்த்துப் பரிமாறவும்.

இது... ஜீரண சக்தியைக் கூட்டும்.

 தயிர் மினி இட்லி

தேவையானவை: மினி இட்லி - 20, தயிர் - 100 கிராம், சாட் மசாலா - ஒரு டீஸ்பூன், சீரகத்தூள், மிளகுத்தூள், உப்பு - தலா கால் டீஸ்பூன், மாதுளை முத்துக்கள், முளைகட்டிய பயறு - தலா 4 டேபிள்ஸ்பூன், நறுக்கிய கொத்தமல்லி - சிறிதளவு.

செய்முறை: தயிருடன் உப்பு, மிளகுத்தூள், சீரகத்தூள், சாட்மசாலா சேர்த்துக் கலக்கவும். இதனுடன் மாதுளை முத்துக்கள், முளைப்பயறு, மினி இட்லி சேர்த்துக் கலந்து, கொத்துமல்லி தூவி பரிமாறவும். விருப்பப்பட்டால் ஆப்பிள், திராட்சை, அன்னாசி, ஸ்ட்ராபெர்ரி பழங்களையும் சேர்க்கலாம்.

சத்தான, எளிதில் ஜீரணமாகக்கூடிய உணவு இது.

 ஜவ்வரிசி மோர் தோசை

தேவையானவை: ஜவ்வரிசி - 100 கிராம், புழுங்கலரிசி - 150 கிராம், பச்சை மிளகாய் - 8, இஞ்சி - ஒரு சிறிய துண்டு, நறுக்கிய கறிவேப்பிலை, கொத்தமல்லி - சிறிதளவு, மோர் - 100 மில்லி, வெங்காயம் - 1 (பொடியாக நறுக்கவும்), எண்ணெய், உப்பு - தேவையான அளவு.

செய்முறை: அரிசியைத் தண்ணீரிலும், ஜவ்வரிசியை மோரிலும் ஒரு மணி நேரம் ஊற வைத்து, முதலில் அரிசியைத் தனியே அரைக்கவும். மோரில் ஊறிய ஜவ்வரிசியுடன் இஞ்சி, பச்சை மிளகாய் சேர்த்து அரைக்கவும். இரண்டு மாவையும் ஒன்றாக சேர்த்து... வெங்காயம், கறிவேப்பிலை, கொத்தமல்லி, உப்பு சேர்த்துக் கலக்கவும். தோசைக்கல்லில் மாவை ஊற்றி, சுற்றிலும் எண்ணெய் விட்டு, மெல்லிய தோசைகளாக சுட்டெடுக்கவும்.

காரச் சட்னி இதற்கு சரியான ஜோடி

 புளி சேரி

தேவையானவை: தயிர் - 100 கிராம், வெண் பூசணி - ஒரு கீற்று, தேங்காய் துருவல் - 4 டீஸ்பூன், சீரகம், துருவிய இஞ்சி - தலா அரை டீஸ்பூன், பச்சை மிளகாய் - 3, மஞ்சள்தூள் - கால் டீஸ்பூன், சின்ன வெங்காயம் - 6, கடுகு, உளுத்தம்பருப்பு, வெந்தயம் - தலா கால் டீஸ்பூன், கறிவேப்பிலை - சிறிதளவு, தேங்காய் எண்ணெய் - 2 டீஸ்பூன், காய்ந்த மிளகாய் - 2, உப்பு - தேவையான அளவு.

செய்முறை: பூசணியைத் துண்டுகளாக நறுக்கி, சிறிது தண்ணீர்,

மஞ்சள்தூள் சேர்த்து வேகவிடவும். தேங்காயுடன் சீரகம், பச்சை மிளகாய், இஞ்சி சேர்த்து அரைத்து, வெந்த பூசணி, சின்ன வெங்காயம் உப்பு சேர்த்து கொதிக்கவிட்டு இறக்கவும். தயிர் சேர்த்துக் கிளறவும். தேங்காய் எண்ணெயைக் காய வைத்து... கடுகு, உளுத்தம்பருப்பு, வெந்தயம், கறிவேப்பிலை, காய்ந்த மிளகாய் தாளித்து, வெந்த பூசணி-தயிர் கலவையில் சேர்த்துப் பரிமாறவும்.

கேரளாவில் விருந்து, பண்டிகை நாட்களில் இந்த பதார்த்தம் கட்டாயம் இடம் பெறும், பெரிய வெள்ளரி அல்லது சுரைக்காய் பயன்படுத்தியும் செய்யலாம்.

 கத்திரிக்காய் - தயிர் கிரேவி

தேவையானவை: கத்திரிக்காய் - கால் கிலோ (நீளமாக நறுக்கவும்), தயிர் - 100 கிராம், இஞ்சி-பூண்டு விழுது - ஒரு டீஸ்பூன், கரம் மசாலாத்தூள், சீரகத்தூள், தனியாத்தூள் - தலா அரை டீஸ்பூன், மிளகாய்த்தூள் - ஒரு டீஸ்பூன், வெங்காயம் - 1 (நறுக்கவும்),

மஞ்சள்தூள் - அரை டீஸ்பூன், பெருங்காயத்தூள் - கால் டீஸ்பூன், பொடியாக நறுக்கிய கொத்தமல்லி - சிறிதளவு, எண்ணெய், உப்பு - தேவையான அளவு.

கிரேவிக்கு அரைக்க: பட்டை, இஞ்சி - தலா ஒரு சிறிய துண்டு, சீரகம் - அரை டீஸ்பூன், தேங்காய் துருவல் - 2 டேபிள்ஸ்பூன், கசகசா - ஒரு டீஸ்பூன், மிளகு - 8, பூண்டு - 4 பல், பச்சை மிளகாய் - 6.

செய்முறை: தயிருடன் இஞ்சி-பூண்டு விழுது, கரம் மசாலாத்தூள், சீரகத்தூள், தனியாத்தூள், மிளகாய்த்தூள் சேர்த்து நன்றாகக் கலக்கவும். கடாயில் எண்ணெய் ஊற்றி, காய்ந்ததும் கத்திரிக்காய் சேர்த்து வதக்கவும்.

அரைக்கக் கொடுத்துள்ளதை அரைத்துக் கொள்ளவும். கடாயில் எண்ணெய் விட்டு, காய்ந்ததும் வெங்காயத்தை சேர்த்து வதக்கி... அரைத்த விழுதைச் சேர்த்து, அடுப்பை 'சிம்'மில் வைத்து 5 நிமிடம் கொதிக்கவிடவும். இதில் மஞ்சள்தூள், பெருங்காயத்தூள் சேர்த்து, தயிர் கலவை, உப்பு சேர்த்து, சிறிது தண்ணீர் விட்டு கொதிக்கவிடவும். நன்றாகக் கொதித்து வரும்போது வதக்கிய கத்திரிக்காய் சேர்த்து மூடி, அடுப்பை 'சிம்'மில் வைத்து 5 நிமிடம் கொதிக்க விட்டு, கொத்தமல்லி தூவி இறக்கவும்.

 உருளை - தயிர் கிரேவி

தேவையானவை: சிறிய உருளைக்கிழங்கு - 12, தயிர் - 2 டேபிள்ஸ்பூன், தேங்காய் துருவல் - 4 டேபிள்ஸ்பூன், பச்சை மிளகாய் - 5, சோம்பு - கால் டீஸ்பூன்,  பட்டை - ஒரு சிறிய துண்டு, ஏலக்காய், கிராம்பு - தலா 1, நறுக்கிய கொத்தமல்லி, புதினா - சிறிதளவு, எண்ணெய், உப்பு - தேவையான அளவு.

செய்முறை: உருளைக்கிழங்கை வேக வைத்து, தோல் உரித்துக் கொள்ளவும். தேங்காயுடன் பச்சை மிளகாய், சோம்பு சேர்த்து அரைக்கவும் கடாயில் எண்ணெய் விட்டு, காய்ந்ததும் பட்டை, கிராம்பு, ஏலக்காய் தாளித்து, வேக வைத்த உருளைக்கிழங்கை சேர்க்கவும். அரைத்த விழுதுடன் சிறிது தண்ணீர் சேர்த்துக் கலக்கி உருளைக்கிழங்குடன் சேர்க்கவும். உப்பு சேர்த்துக் கொதிக்க விடவும். பச்சை வாசனை போனதும் தயிர் சேர்த்துக் கலந்து இறக்கி, கொத்தமல்லி, புதினா தூவவும்.

 தஹி பிண்டி

தேவையானவை: வெண்டைக்காய் - கால் கிலோ, தயிர் - 100 கிராம், இஞ்சித் துருவல் - ஒரு டீஸ்பூன், மிளகுத்தூள், சீரகத்தூள் - தலா கால் டீஸ்பூன், காய்ந்த மிளகாய் - 2, கறிவேப்பிலை - சிறிதளவு, எண்ணெய், உப்பு - தேவையான அளவு.

செய்முறை: கடாயில் எண்ணெய் ஊற்றி, துண்டுகளாக நறுக்கிய வெண்டைக்காயைப் போட்டு 3 நிமிடம் வதக்கி தனியே வைக்கவும். மீண்டும் கடாயில் எண்ணெய் ஊற்றி... சீரகத்தூள், காய்ந்த மிளகாய், கறிவேப்பிலை தாளித்து, இஞ்சித் துருவல், மிளகுத்தூள் சேர்த்து வதக்கவும். வதக்கிய வெண்டைக்காய், தயிர், உப்பு சேர்த்து, மிதமான தீயில் 5 நிமிடம் வேகவிட்டு எடுக்கவும்.

இது, சப்பாத்திக்கு ஏற்ற சைட் டிஷ்!

 தஹி பக்கோடா

தேவையானவை: பச்சைப் பயறு - 100 கிராம், கறுப்பு உளுந்து - 50 கிராம், இஞ்சி - ஒரு சிறிய துண்டு, சீரகம் - கால் டீஸ்பூன், காய்ந்த மிளகாய் - 3, தயிர் - 150 கிராம், மிளகாய்த்தூள், நறுக்கிய கொத்தமல்லி - சிறிதளவு, எண்ணெய், உப்பு - தேவையான அளவு.

செய்முறை: பச்சைப் பயறு, உளுந்து இரண்டையும் சேர்த்து இரண்டு மணி நேரம் ஊற வைத்து... இஞ்சி, சீரகம், காய்ந்த மிளகாய், உப்பு சேர்த்து கரகரப்பாக அரைக் கவும். இந்த மாவை சிறிய உருண்டைகளாக உருட்டி, காயும் எண்ணெயில் பொரித்தெடுக்கவும். பொரித்த வற்றை தண்ணீரில் போட்டு தனியே எடுத்து வைக்கவும். ஒரு பாத்திரத்தில், தயிரை விட்டு உப்பு, சேர்த்துக் கலக்கவும். இதில் பக்கோடாக் களைப் போட்டு... மிளகாய்த் தூள், கொத்தமல்லி தூவி பரிமாறவும்.

 தஹி பூரி

தேவையானவை: மைதா - 50 கிராம், ரவை, கேரட் துருவல் - தலா 2 டேபிள்ஸ்பூன், வேக வைத்த உருளைக்கிழங்கு - 2, சாட் மசாலா - அரை டீஸ்பூன், மிளகுத்தூள், சீரகத்தூள், மிளகாய்த்தூள் - தலா கால் டீஸ்பூன், தயிர் - 100 கிராம், நறுக்கிய கொத்தமல்லி, புதினா - சிறிதளவு, எண்ணெய், உப்பு - தேவையான அளவு.

செய்முறை: மைதாவில் ரவை, உப்பு சேர்த்து சிறிது தண்ணீர் விட்டு பிசைந்து... சிறு சிறு பூரிகளாக இட்டு, காயும் எண்ணெயில் பொரித்தெடுக்கவும். வெந்த உருளைக்கிழங்கை மசித்து... கேரட் துருவல், உப்பு, மிளகாய்த்தூள் சேர்த்துக் கிளறவும். தயிரில் மிளகுத்தூள், சீரகத்தூள், சாட் மசாலா சேர்த்துக் கலக்கவும்.

பூரிகளின் நடுவே சிறு ஓட்டை போட்டு, அதனுள் மசித்த உருளைக்கிழங்கு கலவையை வைத்து, மேலாக தயிர் ஊற்றி... கொத்தமல்லி, புதினா தூவி பரிமாறவும்.

 மார்வாரி கடி

தேவையானவை: புளித்த தயிர் - 100 கிராம், கடலை மாவு - ஒரு டேபிள்ஸ்பூன், மஞ்சள்தூள் - ஒரு டீஸ்பூன், நெய் - ஒரு டேபிள்ஸ்பூன், பெருங்காயத்தூள் - ஒரு சிட்டிகை, பிரிஞ்சி இலை - 2, கடுகு - அரை டீஸ்பூன், காய்ந்த மிளகாய் - 3, மிளகாய்த்தூள் - அரை டீஸ்பூன், உப்பு - தேவையான அளவு.

செய்முறை: தயிருடன் கடலை மாவு, உப்பு, மஞ்சள்தூள் சேர்த்து, ஒரு கப் தண்ணீர் விட்டு கலந்து, மிதமான தீயில் 2-3 நிமிடம் கொதிக்க வைத்து இறக்கவும். மற்றொரு கடாயில் நெய் விட்டு... கடுகு, பெருங்காயத்தூள், பிரிஞ்சி இலை, காய்ந்த மிளகாய் தாளித்து சேர்க்கவும். மிளகாய்த்தூளை ஒரு டீஸ்பூன்

தண்ணீரில் கரைத்து, தயிர் கலவையில் சேர்த்து, எல்லாவற்றையும் ஒன்றாகக் கலக்கவும்.

சப்பாத்திக்கு தொட்டுக் கொள்ளலாம். சாதத்துடனும் கலந்து சாப்பிடலாம்.

 உருண்டை மோர்க்குழம்பு

தேவையானவை: கடலைப்பருப்பு, துவரம்பருப்பு - தலா 50 கிராம், சோம்பு, மஞ்சள்தூள், கடுகு, வெந்தயம், உளுத்தம்பருப்பு, சீரகம், மிளகு - தலா கால் டீஸ்பூன், காய்ந்த மிளகாய் - 3, தேங்காய் துருவல் - 2 டேபிள்ஸ்பூன், பச்சை மிளகாய் - 4, இஞ்சி - ஒரு சிறிய துண்டு, மோர் - 200 மில்லி, கறிவேப்பிலை - சிறிதளவு, தேங்காய் எண்ணெய் - ஒரு டீஸ்பூன், எண்ணெய், உப்பு - தேவையான அளவு.

செய்முறை: துவரம்பருப்பு, கடலைப்பருப்பை ஒரு மணி நேரம் ஊற வைத்து... சோம்பு, சீரகம், மிளகு, காய்ந்த மிளகாய், உப்பு சேர்த்து அரைத்து, சிறு உருண்டைகளாக உருட்டிக் கொள்ளவும். தேங்காயுடன் இஞ்சி, பச்சை மிளகாய் சேர்த்து அரைத்து, தண்ணீர் விட்டு நீர்க்க கரைக்கவும். கடாயில் எண்ணெய் ஊற்றி, கடுகு, உளுத்தம்பருப்பு, கறிவேப்பிலை, வெந்தயம் தாளித்து... உப்பு, அரைத்த தேங்காய் விழுதை சேர்த்து கொதிக்கவிடவும். நன்றாக கொதித்து வந்ததும் அடுப்பை 'சிம்'மில் வைத்து ஒவ்வொரு உருண்டைகளாகப் போடவும். எல்லாம் சேர்ந்துக் கொதித்ததும், மோரில் சிட்டிகை உப்பு,

மஞ்சள்தூள் சேர்த்துக் கலக்கி, குழம்புடன் சேர்த்து, கொதித்து வரும்போது இறக்கவும். தேங்காய் எண்ணெயை மேலாக ஊற்றவும்.

 ஸ்ட்ராபெர்ரி லஸ்ஸி

தேவையானவை: தயிர் - 100 கிராம், ஸ்ட்ரா பெர்ரி பழம் - 4, பொடித்த சர்க்கரை - 2 டீஸ்பூன், உப்பு - ஒரு சிட்டிகை.

செய்முறை: பொடியாக நறுக்கிய ஸ்ட்ராபெர்ரி பழத்துடன் தயிர், சர்க்கரை, உப்பு சேர்த்து நன்றாக நுரை வரும்வரை மிக்ஸியில் அடிக்கவும். குளிர வைத்துப் பரிமாறவும்.

 சூரத் கடி

தேவையானவை: தயிர் - 150 கிராம், கடலை மாவு - 2 டேபிள்ஸ்பூன், இஞ்சி-பச்சை மிளகாய் விழுது, சர்க்கரை, நெய், சீரகம் - தலா ஒரு டீஸ்பூன், நறுக்கிய கறிவேப்பிலை, கொத்தமல்லி - சிறிதளவு, எண்ணெய், உப்பு - தேவையான அளவு.

செய்முறை: தயிரை நன்றாகக் கடைந்து, கடலை மாவு சேர்த்துக் கலக்கவும். இதனுடன் தேவையான தண்ணீர், சீரகம், இஞ்சி-பச்சை மிளகாய் விழுது, சர்க்கரை, உப்பு சேர்த்துக் கலக்கவும். கடாயில் நெய், எண்ணெயை ஊற்றி சூடாக்கி, கறிவேப்பிலை தாளித்து, தயிர் கலவையை சேர்த்துக் கொதிக்கவிடவும். நன்றாகக் கொதித்து வரும்போது கொத்தமல்லித் தழை தூவி இறக்கவும்.

சப்பாத்திக்கு ஏற்ற சைட் டிஷ். சூடான சாதத்துடன் கலந்தும் சாப்பிடலாம்.

 தஹி ரிங் சாட்

தேவையானவை: அரிசி மாவு - 50 கிராம், மிளகாய்த்தூள் - ஒரு டீஸ்பூன், சாட் மசாலா - அரை டீஸ்பூன், ஓமப்பொடி - 2 டேபிள்ஸ்பூன், கேரட் துருவல் - ஒரு டேபிள்ஸ்பூன், வெங்காயம் - 1 (பொடியாக நறுக்கவும்), நறுக்கிய கொத்தமல்லி - சிறிதளவு, தயிர் - 100 கிராம், உப்பு - தேவையான அளவு.

செய்முறை: அரிசி மாவுடன் உப்பு, அரை டீஸ்பூன் மிளகாய்த்தூள் சேர்த்து முறுக்கு மாவு பதத்தில் பிசைந்து கொள்ளவும். இந்த மாவை கையில் எடுத்து சிறு சிறு வளையம் போல் வட்ட வடிவமாக (ரிங்) சுற்றிக் கொள்ளவும். இதை ஆவியில் வேக வைத்து எடுக்கவும். ஒரு பாத்திரத்தில் வெந்த ரிங்க் துண்டுகள், கேரட் துருவல், வெங்காயம், சிறிதளவு உப்பு, அரை டீஸ்பூன் மிளகாய்த் தூள், சாட் மசாலா, தயிர் சேர்த்து நன்றாகக் கலக்கவும். ஓமப்பொடி, கொத்த மல்லியை மேலாகத் தூவி பரிமாறவும்.

 இன்ஸ்டன்ட் தயிர் வடை

தேவையானவை: பிரெட் ஸ்லைஸ் - 8, தயிர் - 50 கிராம், பச்சை மிளகாய் விழுது, இஞ்சி விழுது - தலா ஒரு டீஸ்பூன், கேரட் துருவல் - 2 டீஸ்பூன், வெங்காயம் - 1 (நறுக்கவும்), பொடியாக நறுக்கிய கறிவேப்பிலை, கொத்தமல்லி - சிறிதளவு, எண்ணெய், உப்பு - தேவையான அளவு.

செய்முறை: பிரெட் துண்டுகளின் ஓரத்தை வெட்டி எடுத்துவிட்டு உதிர்த்துக் கொள்ளவும். பாத்திரத்தில் தயிர், கேரட், வெங்காயம், இஞ்சி விழுது, பச்சை மிளகாய் விழுது, கறிவேப்பிலை, கொத்தமல்லி, உப்பு, உதிர்த்த பிரெட்டை சேர்த்துக் கெட்டியாக பிசைந்து கொள்ளவும். இதில் சிறிது எடுத்து வடை போல் தட்டி, தோசைக்கல்லில் போட்டு, சுற்றிலும் எண்ணெய் விட்டு சுட்டு எடுக்கவும். பரிமாறும்போது தயிரை சிறிது சிறிதாக ஊற்றி, கொத்தமல்லி தூவி பரிமாறவும்.

 தஹி பனீர்

தேவையானவை: பனீர் - 200 கிராம், தயிர் - 100 கிராம், இஞ்சி, பட்டை - தலா ஒரு சிறிய துண்டு, மஞ்சள்தூள், சீரகத்தூள் - தலா கால் டீஸ்பூன், பூண்டு - 4 பல், பச்சை மிளகாய் - 4, கசகசா, சீரகம் - தலா அரை டீஸ்பூன், பிரிஞ்சி இலை - 1, வெங்காயம் - 1 (நறுக்கவும்), புதினா, கொத்தமல்லி - சிறிதளவு, எண்ணெய் - 2 டீஸ்பூன், உப்பு - தேவையான அளவு.

செய்முறை: இஞ்சி, பூண்டு, சீரகம், கசகசா, பச்சை மிளகாய், பட்டை ஆகியவற்றுடன் தண்ணீர் சேர்த்து விழுதாக அரைக்கவும், கடாயில் எண்ணெய் விட்டு, காய்ந்ததும்  பிரிஞ்சி இலை தாளித்து, வெங்காயம் சேர்த்து வதக்கவும். இதனுடன் பனீர் துண்டுகள், உப்பு, அரைத்த விழுது சேர்த்து, சிறிது தண்ணீர் விட்டு கொதிக்க விடவும். தயிருடன் உப்பு, மஞ்சள்தூள், சீரகத்தூள் சேர்த்துக் கலக்கி, பனீர் கலவையுடன் சேர்த்துக் கிளறி... புதினா, கொத்தமல்லி தூவி இறக்கவும்.

சப்பாத்தி, புலாவ் வகைகளுக்கு ஏற்ற சைட் டிஷ் இது.

 கம்பு மோர்க்கூழ்

தேவையானவை: கம்பு மாவு - 100 கிராம், மோர் - 150 மில்லி, சின்ன வெங்காயம் - 6, சீரகம் - கால் டீஸ்பூன், உப்பு - தேவையான அளவு.

செய்முறை: ஒரு பாத்திரத்தில் இரண்டு டம்ளர் தண்ணீரைக் கொதிக்க வைத்து... அதில் கம்பு மாவு, உப்பு, சீரகம் சேர்த்துக் கூழாக காய்ச்சவும். காய்ச்சிய கூழை ஆற வைத்து, மோர் சேர்த்துக் கலக்கவும். இதில் நறுக்கிய சின்ன வெங்காயத்தை சேர்த்துப் பருகவும்.

 மாம்பழ மோர்குழம்பு

தேவையானவை: மாம்பழம் - 1, தயிர் - 100 கிராம், இஞ்சி - சிறிதளவு, பச்சை மிளகாய் - 2, தேங்காய் துருவல் - 4 டீஸ்பூன், கடுகு, உளுத்தம்பருப்பு, சீரகம், வெந்தயம் - தலா கால் டீஸ்பூன், காய்ந்த மிளகாய் - 2, கறிவேப்பிலை - சிறிதளவு, எண்ணெய், உப்பு - தேவையான அளவு.

செய்முறை: இஞ்சி, பச்சை மிளகாய், சீரகம், தேங்காய் ஆகியவற்றுடன் சிறிது தண்ணீர் சேர்த்து விழுதாக அரைத்துக் கொதிக்கவிடவும். இதில் உப்பு, கடைந்த தயிர், மாம்பழத் துண்டுகள் சேர்த்து, கொதித்து வந்ததும் இறக்கவும். எண்ணெயில் கடுகு, உளுத்தம்பருப்பு, வெந்தயம், கறிவேப்பிலை, காய்ந்த மிளகாய் தாளித்து சேர்க்கவும்.  

 மோர் வடை

தேவையானவை: புழுங்கலரிசி, புளித்த மோர் - தலா 200 கிராம், ஜவ்வரிசி - 50 கிராம், இஞ்சி - ஒரு சிறிய துண்டு, காய்ந்த மிளகாய் - 5, நறுக்கிய கறிவேப்பிலை, கொத்தமல்லி - சிறிதளவு, வெங்காயம் - 1 (பொடியாக நறுக்கவும்), எண்ணெய், உப்பு - தேவையான அளவு.

செய்முறை: அரிசியை மோரில் ஒரு மணி நேரம் ஊற வைத்து அரைத்து... இஞ்சி, காய்ந்த மிளகாய் சேர்த்து மீண்டும் அரைக்கவும். ஜவ்வரிசியை ஒரு மணி நேரம் தண்ணீரில் ஊற வைத்து வடித்து, அரைத்த மாவுடன் சேர்க்கவும். இதனுடன் உப்பு, வெங்காயம், கறிவேப்பிலை, கொத்தமல்லி சேர்த்துக் கலந்து, சிறிய வடைகளாகத் தட்டி, காயும் எண்ணெயில் பொரித்தெடுக்கவும்.

கிளிப்பேச்சு...மொழி போச்சு !

 குழந்தை மனநல மருத்துவர் ஜெயந்தினி

ராகுல் சென்... கொல்கத்தாவைச் சேர்ந்த இந்த நான்கு வயது சிறுவனை என்னிடம் அழைத்து வந்தார்கள். ''குட்டி ராகுலுக்கு என்ன ஸ்வீட் ரொம்பப் பிடிக்கும்?'' என தமிழில் கேட்டேன். பதில் சொல்லத் தடுமாறினான். அதையே ஆங்கிலத்தில் கேட்டேன். அதற்கும் பதிலில்லை. அவன் தாய்மொழியான பெங்காலியில் கேட்டபோதும் தடுமாற்றமே!

''இப்படித்தான்... அவனுக்குப் பேச்சும் சரியா வரல... நாம பேசறதைப் புரிஞ்சுக்கவும் சிரமப்படறான். பேச்சுலயே இவ்வளவு பிரச்னை இருந்தா, பாடமெல் லாம் எப்படிப் படிப்பான்..?'' என்றார் அவனுடைய அம்மா மனதெல்லாம் தவிப்புடன்.

அவரிடம், ''குழந்தைகிட்ட வீட்ல என்ன மொழியில பேசுவீங்க..?'' எனக் கேட்டேன். ''எங்க தாய்மொழியில தான் பேசுறோம் டாக்டர்...'' என்றார். ''அவனுடைய அப்பா அவனிடம் என்ன மொழியில பேசுகிறார்?'' என்றதற்கு, ''இங்கிலீஷ், பெங்காலினு ரெண்டு மொழி யிலயும் பேசுவார்'' என்றார். ''அக்கம் பக்கத்துல அவன் வயசு குழந்தைங்க அவன் கூட விளையாடும் போதும், ஸ்கூல்லயும் என்ன மொழியில பேசுவாங்க..?'' என்றேன். ''நாங்க இருக்கறது கொஞ்சம் வசதியான அபார்ட் மென்ட். அங்க எல்லா குழந்தைகளும் இங்கிலீஷ் மீடியத்துல படிக்கறதால பெரும்பாலும் இங்கிலீஷ்தான். ஸ்கூல்லயும் அதேதான்'' என்றார் அவனுடைய அம்மா பயத்துடனும் குழப்பத்துடனும்!

அங்குதான் பிரச்னையே! குழந்தை, தான் வளரும் சூழ்நிலையில் தமிழ், ஆங்கிலம், பெங்காலி என்று மூன்று மொழிகளைக் கேட்டு வளர்ந்திருக்கிறான். அங்கே, பெரும்பாலானவர்களால் பேசப்படும் மொழி ஆங்கிலம். ஆனால், அவனுடன் அதிகம் பேசும் அம்மா, பெங்காலியில் பேசியிருக்கிறார். அதனால் எந்த மொழியையும் முழுமையாக கற்றுக் கொள்ள முடியாமல் போனதால், பள்ளியிலும் சரியாகப் படிக்க முடியவில்லை; தான் பேச நினைக்கும் விஷயங்களைச் சரியாகவும் முழுமையாகவும் சொல்ல முடியவில்லை அவனால்.

மாநிலம் விட்டு மாநிலமோ, வெளிநாடு சென்றோ வாழும் இளம் பெற்றோர்களின் சிறுவயது பிள்ளைகள் சந்திக்கும் பெரும் பிரச்னை இது. இதற்கு தீர்வு..?! வாழிடத்திலும் சுற்றுப்புறத்திலும் பெரும்பான்மையான மக்கள் பேசும் மொழியையே பேசுவதுதான் குழந்தையின் பகுத்தறிவை வளர்க்கும்; நட்பு வட்டமும் விரிவடையும். இல்லையென்றால், 'எனக்கு அவங்ககிட்ட என்ன பேசுறதுனு தெரியலையே...' என்று வீட்டுக்குள்ளயே சுருங்கிவிடும். அது, குழந்தையின் ஒட்டுமொத்த வளர்ச்சியையும் தடுக்கும்.

க்ருஷாங்கினியின் கதையைப் பார்ப்போம். உலக மேப்பில் எந்த நாட்டின் பெயரைச் சொன்னாலும், சரியாகக் காட்டுவாள். ஒரு நாட்டின் கொடியைக் காண் பித்தால்... எந்த நாட்டுக் கொடி என்பதை அழகு மழலையில் அடுத்த நொடியே சொல்லி விடுவாள். வீட்டுக்கு யார் வந்தாலும் இவளைக் கூப்பிட்டு 'அதை சொல்லும்மா... இதை சொல்லும்மா' என்று பெருமைப்படுவார்கள் பெற்றோர். ஆனால், அவளிடம் வேறு எந்த விஷயங் களைச் சொன்னாலும் உடனே புரிந்து கொள்ள மாட்டாள். காரணம், சொன்னதைச் திருப்பி சொல்லும் கிளிப்பிள்ளையாகத்தான் க்ருஷாங்கினி வளர்க்கப்பட்டிருக்கிறாள். பெற்றோர் திரும்பத் திரும்பச் சொல்லித் தந்தவற்றை மனப்பாடமாக வைத்துக் கொண்டு, யார் கேட்டாலும் 'கடகடவென' ஒப்பித்திருக்கிறாள்.

உண்மையான மொழியறிவு என்பது சொன்னதைத் திருப்பிச் சொல்லும் 'கிளிப் பேச்சு' அல்ல. ஒரு விஷயத்தைக் காதால் கேட்டு, கண்ணால் பார்த்து, அறிவால் புரிந்து கொண்டு பேசுவதுதான் குழந்தையின் பகுத்தறிவை ஒழுங்காகவும் சரியாகவும் வளர்க்கும். அது இருந்தால்தான் எங்கும் எதிலும் உச்சத்தை தொட முடியும்.

அறிவார்ந்த மொழிப்பேச்சு இருக்கும் குழந்தைதான் தான் நினைக்கும், உணரும் விஷயங்களைச் சரியாகச் சொல்லும். அந்தத் திறன் இருக்கிற குழந்தையால்தான் பள்ளியில் என்ன சொல்லித் தருகிறார்கள் என்பதை முழுமையாகப் புரிந்து படிக்க முடியும். அப்படியான திறன் இல்லாத குழந்தைகள், பிராக்டிகல் நாலெட்ஜில் பின்தங்குவார்கள். உதாரணமாக, 'ரைட்டிங்' என்ற ஆங்கில வார்த்தையின் ஸ்பெல்லிங்கை மனப்பாடம் செய்து 'டிக்டேஷன்'ல் சரியாக எழுதி விடுவார்கள். ஆனால், வகுப்பில் 'ரைட்டிங்' என்ற வார்த்தையை வைத்து ஐந்து வரிகள் சுயமாக எழுதச் சொன்னால்... விழிபிதுங்கி நிற்பார்கள்.

மாறாக, 'ரைட்டிங்' என்ற வார்த்தைக்கான சரியான அர்த்தத்தை புரிந்து வைத்திருக்கும் குழந்தை, அழகான கட்டுரையையே எழுதி மிஸ்ஸிடம் 'வெரிகுட்' வாங்கி, அந்த நிமிட ஸ்டார் ஆகிவிடுவாள்.

ஆகையால், உங்கள் குழந்தை சொன்னதைச் சொல்லும் 'கிளிப்பிள்ளை'யாக இருக்கிறதா..? அறிவார்ந்த 'மொழிப்பிள்ளை'யாக இருக் கிறதா என்பதை கூர்ந்து கவனியுங்கள். உங்கள் கவனிப்புதான் குழந்தையை வெற்றிப் படிக்கட்டுகளில் ஏற வைக்கும் ஏணி!

குருப்பெயர்ச்சி பலன்கள் !

09.5.2011 முதல் 16.5.2012 வரை

 'ஜோதிட ரத்னா' கே.பி.வித்யாதரன்

நிகழும் கர வருடம் சித்திரை மாதம் 25-ம் தேதி திங்கட்கிழமை (9.5.2011) சுக்ல பட்சத்து சஷ்டி திதியில் புனர்பூசம் நட்சத்திரம் சூலம் நாமயோகம் தைத்துலம் நாமகரணம் நேத்திரம் ஜீவனுள்ள சித்தயோகத்தில் குரு ஹோரையில் சூரியம் உதயம் புக பெயர்ச்சி நாழிகை 48-க்கு சரியான நேரம் அதிகாலை மணி 1.12க்கு உபயவீடான மீனத்திலிருந்து சர வீடான மேஷத்துக்குள் குருபகவான் நுழைகிறார். மெய் ஞானத்துக்கும், வேதங்களுக்கும், உபநிடதங்களுக்கும் உரிய கிரகமான குருபகவான் 9.5.2011 முதல் 16.5.2012 வரை மேஷ ராசியில் அமர்ந்து ஆட்சி செலுத்துவார்.

 

மேஷம்: தொலைநோக்கு சிந்தனையுள்ளவர்களே... குருபகவான் ராசிக்குள்ளேயே ஜென்ம குருவாக அமர்வதால், எதிர்பார்த்தவை தாமதமாகும். குரு உங்களின் 7-ம் வீட்டையும், 5-ம் வீட்டையும் பார்ப்பதால், ஓரளவு நிம்மதி உண்டு. குரு உங்களின் 9-ம் வீட்டை பார்ப்பதால், பணவரவு ஏற்படும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், அந்த நட்சத்திரக்காரர்களுக்கு உடல் உபாதை வந்து செல்லும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை குருபகவான் பரணி நட்சத்திரத்தில் செல்வதால், அந்த நட்சத்திரக்காரர்களுக்கு வீண் விரயம் ஏற்படக்கூடும். 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால், அந்த பாதத்தில் பிறந்தவர்களுக்கு தூக்கமின்மை, விரக்தி வரக்கூடும். வியாபாரத்தில் ஆழம் தெரியாமல் காலை விடாதீர்கள். உத்யோகத்தில் சம்பளம் உயரும்.  

பரிகாரம்: அருகில் இருக்கும் சிவாலயத்திலுள்ள ஸ்ரீதட்சணாமூர்த்தியை வியாழக் கிழமையில் சென்று வணங்குங்கள்.

ரிஷபம்: கூடி வாழ்பவர்களே... குருபகவான் உங்கள் ராசிக்கு விரய வீடான 12-ம் வீட்டில் அமர்வதால், குடும்பத்தில் அடுத்தடுத்து சுபநிகழ்ச்சிகள் நடக்கும். அஷ்டமதியாபதியான குருபகவான் 12-ல் மறைவதால், செலவுகள் அதிகரிக்கும். குருபகவான் உங்கள் 4-ம் வீட்டைப் பார்ப்பதால், வீடு கட்ட வங்கிக் கடன் கிடைக்கும். குரு 6-ம் வீட்டையும், 8-ம் வீட்டையும் பார்ப்பதால், எதிர்த்தவர்கள் நண்பர்களாவார்கள். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், உடல் உபாதை வந்து செல்லும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை உங்கள் ராசிநாதனான சுக்கிரனின் பரணி நட்சத்திரத்தில் குரு செல்வதால்... ஆடை, ஆபரணம், சொத்துச் சேர்க்கை உண்டு. 2.5.2012 முதல் 16.5.2012 வரை குருபகவான் உங்கள் சுகாதிபதியான சூரியனின் நட்சத்திரமான கார்த்திகை 1-ம் பாதத்தில் செல்வதால், அரசு காரியங்கள் விரைந்து முடியும். வியாபாரத்தை விரிவுபடுத்துவீர்கள். உத்யோகத்தில் புது சலுகைகள் கிட்டும்.  

பரிகாரம்: அருகிலிருக்கும் ஸ்ரீபெருமாள் கோயிலுக்குச் சென்று வணங்குங்கள்.

மிதுனம்: சமாதானத்தை விரும்புபவர்களே... குருபகவான் 9.5.2011 முதல் 16.5.2012 வரை உங்கள் ராசிக்கு லாப வீட்டில் தொடர்வதால், எதிர்பார்ப்புகள் நிறைவேறும். மகனுக்கு வெளிநாடு செல்லும் வாய்ப்பு வரும். மகளுக்கு உயர்கல்வி நல்ல விதத்தில் அமையும். உங்கள் ராசிக்கு 3-ம் வீட்டையும், 7-ம் வீட்டையும் குரு பார்ப்பதால், தைரியம் கூடும். உடல் நலக் கோளாறு நீங்கும். பூர்வீக சொத்தால் வருமானம் வரும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், பணப்புழக்கம் அதிகரிக்கும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை உங்கள் பூர்வ புண்யாதிபதியான சுக்கிரனின் பரணி நட்சத்திரத்தில் செல்வதால், வீடு, வாகன வசதி பெருகும். 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால்... உங்களின் கௌரவம் உயரும். வியாபாரத்தில்  புது ஒப்பந்தங்கள் செய்வீர்கள். உத்யோகத்தில் சவாலான வேலைகளையும் சாதாரணமாக முடிப்பீர்கள்.

பரிகாரம்: அருகிலிருக்கும் அம்மன் ஆலயத்துக்கு சென்று நெய் விளக்கு ஏற்றுங்கள்.

கடகம்: கடமை தவறாதவர்களே...  உங்கள் ராசிக்கு 10-ம் வீட்டில் அமரும் குரு பகவான், உங்களை திடமான முடிவுகளை எடுக்க வைப்பார். உங்கள் ராசிக்கு 2-ம் வீடான தன ஸ்தானத்தை குரு பார்ப்பதால், எதிர்பார்த்த இடத்திலிருந்து பணம் வரும். உங்கள் ராசிக்கு சுக வீடான 4-ம் வீட்டையும், 6-ம் வீட்டையும் குரு பார்ப்பதால், உடல் உபாதை நீங்கும். புண்ணிய தலங்களுக்குச் சென்று வருவீர்கள். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், வீண் அலைச்சல் ஏற்படலாம். என்றாலும், பணவரவு அதிகரிக்கும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை குருபகவான், பரணி நட்சத்திரத்தில் செல்வதால், எதிர்ப்புகள் அடங்கும். 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால், உறவினர்கள் மதிப்பார்கள். வியாபாரத்தில் அதிரடி சலுகைகள் மூலம் லாபமடைவீர்கள். உத்யோக ஸ்தானமான பத்தாம் வீட்டில் குரு நிற்பதால், வேலைச்சுமை அதிகரிக்கும். சம்பளம் உயரும்.

பரிகாரம்: குலதெய்வ கோயிலுக்குச் சென்று வாருங்கள்.

சிம்மம்: வாய்மையாளர்களே...  உங்கள் ராசிக்கு 9-ம் வீட்டில் குரு அமர்வதால், குடும்பத்தில் மகிழ்ச்சி தங்கும். குருபகவான் உங்கள் ராசியையும், 3-ம் வீட்டையும் பார்ப்பதால், தோற்றப் பொலிவு கூடும். தடைப்பட்ட காரியங்கள் விரைந்து முடியும். குரு உங்களின் 5-ம் வீட்டைப் பார்ப்பதால் மகனுக்கு வேலை கிடைக்கும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், மகம் நட்சத்திரக்காரர்களுக்கு  உடல் உபாதை வந்து நீங்கும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை பரணி நட்சத்திரத்தில் செல்வதால், மகம் நட்சத்திரத்திரக்காரர்களுக்கு சொத்து சேரும். ஆனால் பூரம் நட்சத்திரக்காரர்களுக்கு காரியத் தடங்கல் வந்து செல்லும். 2.5.2012 முதல் 16.5.2012 வரை குருபகவான் உங்கள் ராசிநாதனான சூரியனின் நட்சத்திரமான கார்த்திகை 1-ம் பாதத்தில் செல்வதால், அரசு காரியங்கள் விரைந்து முடியும். வியாபாரத்தில் புது ஒப்பந்தங்களால் லாபம் அதிகரிக்கும். உத்யோகத்தில் சம்பள பாக்கி கைக்கு வரும்.  

பரிகாரம்: அருகிலுள்ள சிவாலயம் சென்று நவக்கிரக வரிசையில் உள்ள குரு பகவானை வணங்குங்கள்.

கன்னி: கலகலப்பாக பேசுபவர்களே... உங்கள் ராசிக்கு 8-ம் வீட்டில் குருபகவான் நுழைவதால், குடும்பத்தில் நல்லது நடக்கும். உங்கள் ராசிநாதனான புதனுக்கு பகைவரான குரு 8-ல் மறைவதால், எவ்வளவு பணம் வந்தாலும் எடுத்து வைக்க முடியாத நிலை இருக்கும். குரு பகவான் உங்களது 2-ம் வீட்டையும், சுக ஸ்தானத்தையும் பார்ப்பதால், உடல் நலம் சீராகும். புது வீடு கட்டி குடிபுகுவீர்கள். குரு 12-ம் வீட்டை பார்ப்பதால், குலதெய்வக் கோயிலுக்குச் சென்று வருவீர்கள். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், போராட்டமாகவே இருக்கும். என்றாலும், வெற்றி பெறுவீர்கள். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை உங்கள் தனபாக்யாதிபதியான சுக்கிரனின் பரணி நட்சத்திரத்தில் செல்வதால், பிரபலங்கள் அறிமுகமாவார்கள். 2.5.2012 முதல் 16.5.2012 வரை குரு பகவான் கார்த்திகை 1-ம் பாதத்தில் செல்வதால், உறவினருடன் கருத்து மோதல் வரும். வியாபாரத்தில் இரட்டிப்பு லாபம் உண்டு. உத்யோகத்தில் அதிகாரிகள் பாராட்டுவார்கள்.    

பரிகாரம்: ஸ்ரீ ஆஞ்சநேயரை வணங்குங்கள்.

துலாம்: நடுநிலையாளர்களே... 9.5.2011 முதல் 16.5.2012 வரை குருபகவான் உங்கள் ராசிக்கு ஏழாம் வீட்டில் தொடர்வதால். எதிர்பாராத பணவரவு உண்டு. குரு உங்கள் ராசியை நேருக்கு நேர் பார்ப்பதால், கணவர் உங்களுக்கு முக்கியத்துவம் தருவார். உங்கள் ராசிக்கு 3 மற்றும் 6-க்கு உரியவரான குரு பகவான் 7-ம் வீட்டில் நுழைவதால், கணவருக்கு உடல் உபாதை வரக்கூடும். உங்கள் ராசிக்கு 3-ம் வீட்டையும், லாப வீட்டையும் குரு பார்ப்பதால், அரசால் அனுகூலம் உண்டு. 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், தடைகள் நீங்கும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை உங்கள் ராசிநாதனான சுக்கிரனின் பரணி நட்சத்திரத்தில் செல்வதால், அடிப்படை வசதிகள் பெருகும். 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால், முக்கிய ஆவணங்களில் கையெழுத்திடும்போது கவனம் தேவை. வியாபாரத்தில் அதிரடி லாபம் உண்டு. உத்யோகத்தில், சக ஊழியர்கள் மதிப்பார்கள்.  

பரிகாரம்: அருகிலுள்ள புற்றுமாரியம்மனை வணங்குங்கள்.

 விருச்சிகம்: மனசாட்சி உள்ளவர்களே... குரு பகவான் உங்கள் ராசிக்கு 6-ம் வீட்டில் நுழைவதால், தடைகள் இருந்தாலும் ஓயமாட்டீர்கள். குரு பகவான் குடும்ப ஸ்தானமான 2-ம் வீட்டை பார்ப்பதால், வருமானம் உயரும். குரு 10-ம் வீட்டைப் பார்ப்பதால், புது வேலைக்கு முயற்சி செய்தவர்களுக்கு நல்ல பதில் வரும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குரு பகவான் அசுவனி நட்சத்திரத்தில் செல்வதால், அனுஷ நட்சத்திரக்காரர்களுக்கு மறைமுக விமர்சனங்கள் வந்து செல்லும். ஆனால்... விசாகம் 4-ம் பாதம், கேட்டை நட்சத்திரக்காரர்களுக்கு பணவரவு அதிகரிக்கும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை பரணி நட்சத்திரத்தில் செல்வதால், கணவருடன் வாக்குவாதம் ஏற்படலாம். 2.5.2012 முதல் 16.5.2012 வரை குருபகவான் உங்கள் ஜீவனாதிபதியான சூரியனின் நட்சத்திரமான கார்த்திகை 1-ம் பாதத்தில் செல்வதால், அயல்நாட்டு பயணம் சாதகமாக அமையும். வியாபாரம் சுமாராக இருக்கும். உத்யோகத்தில் மற்றவர் களை நம்பி எந்த பொறுப்பையும் ஒப்படைக்க வேண்டாம்.

பரிகாரம்: அருகிலுள்ள விநாயகர் கோயிலுக்கு சென்று வணங்குங்கள்.

 

தனுசு: தாராள மனது கொண்டவர்களே... 9.5.2011 முதல் 16.5.2012 வரை குருபகவான் உங்கள் ராசிக்கு 5-ம் வீட்டில் தொடர்வதால், வீட்டில் சுப நிகழ்ச்சிகள் நடக்கும். கணவர் அன்பாக இருப்பார். குரு உங்கள் ராசியை பார்ப்பதால், புதுத் தெம்பு பிறக்கும். புதிய டிசைனில் நகை வாங்குவீர்கள். குருபகவான் உங்களின் 9-ம் வீட்டையும், லாப வீட்டையும் பார்ப்பதால், வெளிவட்டாரத்தில் மதிப்பு கூடும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், மூலம் நட்சத்திரக்காரர்களுக்கு திட்டமிட்ட காரியங்கள் கைகூடும். வீடு கட்டுவது, வாங்குவது லாபகரமாக முடியும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை பரணி நட்சத்திரத்தில் செல்வதால், பணத் தட்டுப்பாடு ஏற்படும். 2.5.2012 முதல் 16.5.2012 வரை குருபகவான் உங்கள் பாக்யாதிபதியான சூரியனின் நட்சத்திரமான கார்த்திகை 1-ம் பாதத்தில் செல்வதால், எதிர்பார்த்த பணம் வரும். வியாபாரத்தில் புது யுக்திகளை கையாளுவீர்கள். உத்யோகத்தில் உயரதிகாரி உங்களை முழுமையாக நம்புவார்.

பரிகாரம்: ஸ்ரீகாலபைரவரை வணங்குங்கள்.

மகரம்: பிரதிபலன் பாராமல் உதவுபவர்களே... உங்கள் ராசிக்கு 4-ம் வீட்டில் குருபகவான் அமர்வதால், தடைகளைத் தாண்டி முன்னேறுவீர்கள். 4.11.11 முதல் உங்கள் ராசிக்கு 8-ல் செவ்வாய் மறைவதால்... மருத்துவச் செலவுகள் வந்து செல்லும். குரு உங்கள் ராசிக்கு 8-ம் வீட்டை பார்ப்பதால், சிலர் வீடு மாற வேண்டிய நிர்ப்பந்தம் உண்டாகும். உங்களின் 10-ம் வீட்டையும், விரய வீடான 12-ம் வீட்டையும் குரு பார்ப்பதால், சுபச் செலவுகள் அதிகரிக்கும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால்... மன உளைச்சல், காரியத் தடை வந்து போகும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை உங்கள் யோகாதிபதியான சுக்கிரனின் பரணி நட்சத்திரத்தில் செல்வதால்... திடீர் பணவரவு, சொத்து சேர்க்கை உண்டு. 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால், வழக்கில் சாதகமான தீர்ப்பு வரும். வியாபாரத்தில் போட்டிகள் இருக்கும். உத்யோகத்தில் வேலைச்சுமை அதிகரிக்கும்.

பரிகாரம்: ஸ்ரீலஷ்மி நரசிம்மரை வணங்குங்கள்.  

கும்பம்: கொடுத்துச் சிவந்த கரத்துக்குச் சொந்தக்காரர்களே... குருபகவான் 9.5.2011 முதல் 16.5.2012 வரை உங்கள் ராசிக்கு 3-ம் வீட்டிலேயே தொடர்வதால், ஓரளவு நிம்மதி கிட்டும்.  உங்களின் 7-ம் வீட்டை குரு பார்ப்பதால், கல்வியாளர்களின் நட்பு கிட்டும். குருபகவான் உங்களின் 9-ம் வீட்டையும், லாப வீட்டையும் பார்ப்பதால், பணவரவு திருப்தி தரும். 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், சமையலறையை நவீனமயமாக்குவீர்கள். கேட்ட இடத்தில் உதவிகள் கிடைக்கும். என்றாலும்... வீண் செலவுகள், டென்ஷன், வந்து செல்லும். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை உங்கள் யோகாதிபதியான சுக்கிரனின் பரணி நட்சத்திரத்தில் செல்வதால், எதிர்பாராத பணவரவு உண்டு. தங்க ஆபரணம் வாங்குவீர்கள். 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால், உடல் உபாதை வந்து நீங்கும். வியாபாரத்தில் பழைய சரக்குகளை போராடி விற்பீர்கள். உத்யோகத்தில் சக ஊழியர்கள் அனுசரணையாக இருப்பார்கள்.

பரிகாரம்: ஸ்ரீ சரபேஸ்வரரை வணங்குங்கள்.                

மீனம்: யதார்த்தவாதிகளே... உங்கள் ராசிக்கு 2-ம் வீட்டில் குருபகவான் அமர்வதால், பணப்புழக்கம் அதிகரிக்கும். குடும்ப ஸ்தானத்தில் குரு அமர்வதால், குடும்பத்தில் உங்கள் வார்த்தைக்கு மதிப்பு கூடும். குரு பகவான் உங்களின் ஆறாவது வீட்டையும், 8-வது வீட்டையும் பார்ப்பதால், சுப நிகழ்ச்சிகளால் வீடு களைக்கட்டும். குரு உங்களின் பத்தாவது வீட்டையும் பார்ப்பதால், அரசால் அனுகூலம் உண்டு. 9.5.2011 முதல் 21.7.2011 வரை மற்றும் 11.10.2011 முதல் 1.3.2012 வரை குருபகவான் அசுவனி நட்சத்திரத்தில் செல்வதால், பழைய சொத்தை விற்று புது வீடு வாங்குவீர்கள். 22.7.2011 முதல் 10.10.2011 வரை மற்றும் 2.3.2012 முதல் 1.5.2012 வரை பரணி நட்சத்திரத்தில் செல்வதால், வெளிநாட்டில் இருப்பவர்களால் உதவிகள் உண்டு. 2.5.2012 முதல் 16.5.2012 வரை குருபகவான் கார்த்திகை 1-ம் பாதத்தில் செல்வதால், பணப்பற்றாக்குறை, அலைச்சல் வந்து செல்லும். வியாபாரத்தில் புதுக் கிளைகள் தொடங்குவீர்கள். உத்யோகத்தில் எதிர்பார்த்த இடமாற்றமும், சம்பள உயர்வும் கிட்டும்.  

பரிகாரம்: ஸ்ரீராகவேந்திரரை வணங்குங்கள்